دراسة طب الأسنان و طب البشري في المملكة المتحدة

dentist1

كثير من يسألني حول كيفية التقديم للدراسة بالمملكة المتحدة و طريقة الدراسة فيها. وكوني طالب انهيت السنة التمهيدية (فاونديشن) لطب الاسنان في مركز انتو مانشستر راح اقولكم كيفية التقديم للجامعة بطريقة مفصلة و مدعمة بالصور، هالموضوع راح اخصصه لمن يرغب بالتقديم لطب الأسنان او البشري في المملكة المتحدة، و الاختلاف في كيفية التقديم لباقي التخصصات بسيط ولكن سأركز على هالتخصصين فقط، بعد ما يتم قبولك في البعثة من قبل وزارة التعليم العالي

الدراسة نقدر نقسمها إلى
سنة لغة
سنة فاونديشن
الفترة الاكاديمية ٥ او ٦ سنوات حسب الجامعة

سنة اللغة:
فيه وايد معاهد و مراكز في بريطانيا للغة و خلال فترة دراسة اللغة لازم تقدم على اختبار الايلتز و تحصل على الدرجة المطلوبة للفاونديشن، شخصيًا ما اخذت سنة لغة لأني حصلت على الدرجة المطلوبة في الايلتز اللي تأهلني للدراسة في الفاونديشن، ولكن الخطير في الموضوع.. ان كورس اللغة يمتد لسنة كاملة ! يعني ما يصير آخذ كورس بو جم شهر و ادش بنص السنة للفاونديشن لأنه نظام سنوات مو مثل امريكا، لذا انصح انكم تطوفون هالسنة بأنكم تييبون الايلتز المطلوب و تدخلون دايركت للفاوندويشن، اغلب طلبة اللغة قالوا انها سنة تضييع و فايدتها شوية.. لأنه اللغة راح تتعلمها غصبًا عليك مو طيب منك 🙂 اما اللي لغته شوي لك عليها.. لأ خلك سنة لغة ضبط امورك و تالي دش الفاونيشن

حسب اللي اعرفه من المكتب الثقافي الكويتي في لندن بأن دخول سنة الفاونذيشن يتطلب درجة ايلتز ٦.٥

سنة الفاونديشن:
كوني في مركز انتو مانشستر ولا اعلم عن الباجي بس اعتقد ان المواد متشابهة ولكن في اختلافات بسيطة

المواد كانت كالتالي:

Chemistry, Biology & Math
هالثلاث مواد عليهم امتحانات و درجات

English, IT, Health Professional Development
هذي مواد مساعدة ماعليها درجات لكن مفيدة للبحوث اللي نسويها و للجامعة فيما بعد

ماراح افصل في المواد.. لكن اللي عنده اي استفسار عن المواد يسألني اهني بالمدوّنة و انا بالشوفة ان شاء الله

نروح لأهم نقطة بموضوعنا واهي شلون نقدم على الجامعة.. احنا ليه اهني نداوم في كلية ما قبل الجامعة كسنة فاونديشن و ماندري عن شي عن الجامعة اللي بندرس فيها بعد الفاونديشن

في بريطانيا نظام التقديم اسمه يوكاس

هذا موقع الكتروني تقدم فيه رغباتك ومعلوماتك و تنطر الرد من الجامعات و راح اقولكم بالتفصيل عنها بعد شوي

من خلال الموقع.. تكتب كل معلوماتك الشخصية و درجاتك في الثانوية و عنوانك و كل التفاصيل راح تلاقيها بالموقع.. المهم انها تكتب بالكامل و هذي صورة بس شوي طويلة عن المعلومات اللي راح تكتبها بالتفصيل في موقع اليوكاس

و يلزم على اللي يقدم للطب بأن يكون ممتحن اختبار الذكاء اسمه يو كيه كات

وهذا تقدرون تاخذونه بالكويت في نيوهرايزن سنتر في مجمع دسمان او تقدرون تسوونه في بريطانيا، بس يفضل تخلصون منه بالكويت، بس لا تتهاونون فيه لأنه بعض الجامعات ياخذون درجة هالامتحان بعين الاعتبار و يفضلون اللي ماخذ الدرجة الأعلى.. و فيه كتب اعتقد بمكتبة جرير عن هالامتحان

في اول فترة من الدوام بسنة الفاونديشن لازم تجهز ما يسمى بالـ“بيرسونال ستيتمنت” و تكتب نفس سيرة ذاتية ولكن مو نقاط بل فقرات چنه مقالة و تذكر ليش تبي تتخصص في الطب؟ وشنو مؤهلاتك ومهاراتك و انجازاتك و جوائزك و مشاركاتك.. و هل عندك خبرة من قبل في مجال الطب؟ هل اشتغلت “شادوينق” مع طبيب بمستشفى او شاركت بحملة طبية توعوية يعني لازم تذكر ما يتعلق بالطب في شخصيتك.. وانك ليش حبيت الطب و شنو اللي خلاك تختار هالتخصص؟ و ليش يخليهم كجامعة تختارك للدراسة عندهم؟ يعني جنك تبيع نفسك.. قول كل اللي تقدر عليه بطريقة متقنة و صحيحة و اسلوب قوي وتوصلهم الرسالة بأنك كفؤ لهالتخصص و لمهاراتك و شخصيتك لدراسة الطب، و موقع الجامعات يكتبون شنو النقاط الرئيسية اللي لازم تنذكر بالبيرسونال ستيتمنت، فأنت لازم تكون ذاكرها بعدد كلمات لا يتجاوز ٤٠٠٠ حرف

بعد ما تخلص البيرسونال ستيتمنت و تتأكد من صحته ترفعه على موقع اليوكاس.. و ديربالك تجذب و تكتب شي انت مو مسويه لأنك راح تنصاد ! بس شلون تنصاد راح تنصاد بالمقابلة الشخصية اللي راح نتكلم عنها بعد شوي 🙂

طبعا من خلال اليوكاس لك الحق -كطالب طب- تقدم على اربع جامعات فقط لاغير وآخر موعد للتقديم هو ١٥/١٠ في كل سنة، بس قبلها لازم تتأكد من فرصة قبولك فيها.. لأنها فرصتك الوحيدة للتقديم لسنة كاملة و من خلال اربع جامعات ! يعني حضرتك لا تتفلسف و تحط جامعة اكسفورد و كامبريدج وتدري انك مو قدها وماراح تنقبل فيهم و تضيع اختيارين من الاربع اللي تحطهم.. فأنت لازم تشوف جامعات يقبلون كويتيين مثلا شوف شنو طريقة الدراسة، فيه جامعات طريقتها دراسة ذاتية “پي بي ال” مثل جامعة مانشستر و فيه جامعات طريقتها محاضرات “ليكتشرز” فأنت قبل لا تقدم شوف الجامعات بالإضافة إلى طلباتهم.. مثل درجة الايلتز درجات المواد في الفاونديشن و الطلبات الأخرى، و أيضا حاول تتواصل مع المكتب الثقافي و مع الطلبة الكويتيين اللي يدرسون طب بهالجامعات، و بعدها تختار افضل اربع جامعات تلوق لك و تعجبك

على سبيل المثال: كلية طب الاسنان في جامعة مانشستر لا تقبل طالب الا ان يكون عنده خبرة لا تقل عن اسبوعين مع طبيب اسنان.. يعني تداوم في عيادة مع دكتور و بعدها تاخذ ورقة من العيادة تثبت انك كنت موجود و لازم تتعلم من هالفترة بأمور تتعلق بطب الأسنان، و هل الشرط مو موجود في بعض الجامعات الأخرى.. النقطة اللي بوصلها انك لازم تختار جامعات مناسبة في اختياراتك الاربعة

المهم، بعد اختيارك اربع جامعات.. البيرسونال ستيتمنت راح يوصلهم من خلال اليوكاس و راح يقرونه و بعدها بفترة يمكن اسبوع اسبوعين شهر شهرين ماتدري متى يردون عليك إما بالرفض او بالقبول.

الرفض.. يعني انسى الموضوع ! شيل من بالك جامعتنا وماراح تدشها.. و بجذي ضاعت احدى اختياراتك
يمكن جامعة وحدة ترفضك.. يمكن اثنين.. يمكن ثلاث يمكن كلهم ! حسب قوة تقديمك للبيرسونال ستيتمنت

في حالة رفض كافة الجامعات.. اهني كارثة، إما انك تنطر بالصيف بالشواغر “الكليرنس” او تعيد سنة الفاونديشن او تغير تخصصك غير الطب او اذا تبي تحول بعثتك لايرلندا او اي مكان ثاني 🙂

اما القبول.. فلا يعني قبولهم لك بالجامعة انما قبولهم بإعطائك مقابلة شخصية..

اذا حصلت على موافقة من جامعة وحدة او اكثر من جامعة راح يعطونك تاريخ معين للمقابلة وتروح و تجهز عمرك للمقابلة بلبس رسمي مثل بدلة و كرفتة و كل جامعة تختلف طريقة مقابلتهم عن الثانية وراح اذكر مثالين مختلفين، و بعد ما تخلص المقابلة راح يخبرونك بعد فترة برفضهم لك او قبولهم.

المقابلات اللي صارت في سنة ٢٠١٢:

اولا طب الأسنان:

جامعة مانشستر:

طبعا الجامعة اعطت ربما مئات الطلبة مقابلات شخصية فمقسمين الطلبة لعدة أيام.. كل يوم اكثر من قروب و كل قروب يتكون من ٩ طلبة يخضعون للمقابلة الشخصية، ٨ طلبة انجليز و طالب واحد بينهم فقط غير انجليزي اللي ممكن يكون الطالب الكويتي طبعا. المقابلة مقسمة لأربعة أقسام: حلقة نقاشية و ٣ مقابلات شخصية منفردة كل منها لمدة ٧ دقايق

أولا الحلقة النقاشية نقعد كلنا مع بعض عالطاولة و كل واحد محددين له مكانه.. و يعطون كل طالب ورقة فيها حالة مريض نقراها لمدة خمس دقايق، و كل طالب عنده معلومة اضافية محد يعرفها من الباجي. بعد الخمس دقايق، النقاش يكون لمدة ربع ساعة بين الطلبة التسعة و ٣ دكاترة يراقبون و يقيمون النقاش على أساس طريقتك في النقاش و كيفية إضافة النقاط الاضافية للقروب و يكون لك دور جيد في النقاش

المثال اللي كان عبارة عن امرأة في الثلاثينات من عمرها مطلقة و هي غير فرحانة بابتسامتها و حالتها في حزن دائم، و فجأة ربحت باليانصيب ٥٠٠٠ باوند و قررت ان تصرفها في تجميل اسنان بطبقة الفينيرز، من خلال ربع ساعة لازم تنتاقش عن محاسن و مساوئ الفينيرز و شنو البدائل و شنو تنصح المريضة بالإضافة إلى مناقشة المعلومات الاضافية اللي مكتوبة عن كل طالب، فهذا مثال واحد من الامثلة للحلقة النقاشية بين الطلبة

بعدها جولة كاملة على كلية طب الاسنان و اقسامهم.. و بعدين كل ٣ طلبة يدشون قاعة للمقابلات الثلاث الشخصية المنفردة

المقابلة الأولى عن البيرسونال ستيتمنت اللي كتبتها مسبقًا و رفعتها في اليوكاس.. عن انجازاتك و هواياتك و مهاراتك و كل شي كتبته، وعن الجامعة و الدراسة و المدينة اللي تدرس فيها، و شرايك بدراسة الـ “پي بي ال” و قارنها مع الطريقة الاعتيادية اللي اهي المحاضرات.. واهني ديربالك تكون كاتب شي بالبرسونال ستيتمنت وانت مو مسويه صج.. لانك راح تنصاد بالاسئلة اذا كنت مشلخ ترا لووول

المقابلة الثانية اسئلة عن الحلقة النقاشية اللي صارت.. شرايك فيها و شنو اهم النقاط اللي انقالت وشنو نقاط الضعف و شلون تحسّن من النقاش؟ و شنو كان دورك وشنو النقاط اللي اثرتها؟ يعني مقابلة كاملة عن اللي الحلقة النقاشية

المقابلة الثالثة و الاخيرة عبارة عن اسئلة افتراضية و اسئلة تتعلق بأخلاقيات المهنة و المجال الطبي.. مثلا كانت الأسئلة عن سرية معلومات المريض و متى تفصح عنها ولمن؟ عن التدخين و شلون نتعامل مع المرضى المدخنين؟ عن حشوات الاملقم “الفضية” مساوئها ومحاسنها، وأيضًا عن الفرق بين عمليات التجميل للأسنان اللي تكون في مراكز التجميل و في العيادات الطبية و شرايكم فيهم؟ يعني اسئلة مافيها صح و غلط ولكن الدكتور يقيم على طريقة تفكيرك و تعاملك مع المريض عن طريق اجاباتك.

و في الجامعات الأخرى طريقة المقابلة غير.. مثال على ذلك جامعة ليدز فقط مقابلة لمدة قصيرة و اسئلة عامة، مافيها نقاش و لا هم يحزنون!

ثانيا طب البشري:

جامعة مانشستر:

نفس طريقة مقابلة طب الاسنان ولكن المواضيع تختلف طبعًا.. و وقت القراءة و النقاش اكثر

الحلقة النقاشية كان فيه نوعين حسب الشباب اللي مقدمين عالطب البشري ومثل ما قلت يعطون حالة لمريض للقراءة و كل طالب عنده معلومة إضافية عن الباجي. الحالة الأولى كانت لشخص مسن شعر بضعف في نظره وقت القراءة و عباله السبب اهو تقدم عمره ولكن بعد الفحص تبين انها مشكلة في احدى قرنية عينيه، و فيه ٣ خيارات للمريض يقدر يقوم فيها: اما ترك الموضوع او علاج طبيعي ام الخضوع لعملية جراحية، و بعدها ٢٠ دقيقة نقاش عن هذه الخيارات بين الطلبة تحت رقابة الدكاترة.

الحالة الثانية لمريض من أصل افريقي عمره ٧٨ مصاب بسرطان البروستات وعلاجه يكمن في تقليل معدل التبول عنده عن طريق اتاحة ٣ خيارات للعلاج ام عن طريق تقليل المشروبات ليلا او علاج هرموني ام الخضوع لعملية جراحية، و بعدها لمدة ٢٠ دقيقة نقاش بين الطلبة حول هالخيارات.

وبعد ما تخلص النقاش المقابلة الأولى عن البيرسونال ستيتمنت و الثانية عن الحلقة النقاشية تماما مثل ما ذكرته سابقا بمقابلة طب الاسنان

اما المقابلة الثالثة واهي عن الاسئلة الافتراضية و المهنية و اللي تتعلق بمهنة الطبيب.. كانت المقابلة عن سرية معلومات المريض وإفشائها و أيضًا عن كيفية الاعتناء بالمرضى المحتاجين لعمليات زراعة الأعضاء وخصوصا بعدم توفر الأعضاء و غلاء سعر هذا النوع من العمليات، و كيفية التعامل من المرضى اللي يعانون من اللايپوما.. و ان كان هناك لاعب كرة قدم يشرب الكحول و مدخن و يحتاج لزراعة كبد، فكيف يكون تعاملك معاه و كيف يكون علاجه؟

وكمثال آخر للمقابلات للطب البشري سأعطيكم ما دار في جامعة سينت اندروز في اسكتلندا..

كانوا يعطون كل طالب مقالة علمية يقراها لمدة ١٠ دقايق و تقدر تنوّت خلال هالوقت و كانت المقالة عن الهندسة الوراثية و أطفال الأنابيب

و بعدها كل طالب يدخل لغرفة بكلية الطب قاعدين فيها شخصية اما أطباء او دكاترة أكاديميين او ممرضين، و لمدة معينة يسولفون معاك بأمور عامة و عن اختيارك للطب و للجامعة وبين انواع الدراسة بين الـ پي بي ال وطريقة المحاضرات.. و أيضا تطرقوا عن بعض الآراء العلمية عن مختلف المواضيع الطبية بشكل عام و عن الكويت بشكل خاص. بعدها، كانت الاسئلة عن المقالة اللي كانت عن الهندسة الوراثية و أطفال الأنابيب. شرايك بهالموضوع و عن أطفال الانابيب و عن الهندسة الوراثية و لخص لي المقالة باختصار.

و ليه اهني احنا خلصنا المقابلة الشخصية اوعطيت لكم امثلة عن جامعة مانشستر لطب الاسنان و البشري و جامعة سينت اندروز للطب البشري، بعد ما نخلص من المقابلة، ننطر الرد على الايميل من الجامعة.

 

اذا وصل رد الجامعة لك بالرفض.. يعني انسى الموضوع بتاتا.. يعني هالجامعة ماراح تقدر تدشها هالسنة ! اما اذا حصلت على قبول فهو قبول مشروط ! شنو هالشرط يا ترى؟ شرطهم غالبا انك تييب في الثلاث مواد اللي تدرسهم في الفاونديشن أيه !
A A A

و أضف إلى ذلك درجة الايلتز اللي تتراوح غالبا مابين ٧ إلى ٧.٥ بالاضافة إلى بعض المستندات المهمة و التحليلات المخبرية اللي تثبت انك لائق عقليا و صحيا للدراسة

و بعد ما تنتهي السنة الدراسية في الفاونديشن و تكون شاد حيلك و تييب الدرجات المطلوبة.. راح يتغير القبول من مشروط إلى قبول غير مشروط بعد ما تكمل كافة الشروط اللي يبونها.. و تكون رسميًا مقبول في الجامعة

و الف مبروك 🙂

كتبت هذا الموضوع لأبين مسألة القبول وصعوبتها.. و انه يبيلها طولة بال و استعداد و صبر، و وايد مايعرفون اللي بيصير قبل لا يقدمون عالطب في بريطانيا، لذا هذا الموضوع وضعته بين ايديكم لتعرفون الاجراءات اللي راح تواجهكم.. و تكونون على بيّنة قبل التقديم للبعثات و تتخذون قراركم باقتناع تام.

و أي سؤال او شرح او استفسار.. انا حاضر كتبوه بالمدوّنة واللي ماعرفه راح اسأل عنه لكم قدر المستطاع

 

UPDATE

 

قد تكون هناك بعض التغييرات قد طرأت على كيفية المقابلة الشخصية لبعض الجامعات بعد عدة سنوات من هذا الموضوع لذا وجب التنويه على ذلك، بالإضافة إلى أن هناك جامعات تطلب امتحان اسمه

BMAT

بدلا من

UKCAT

وهي الجامعات التالي حسب الأخبار الأخيرة لعام ٢٠١٥:

Brighton and Sussex Medical School (BSMS) will use BMAT for Medicine (UCAS code: A100) for all applicants.

Imperial College London will use BMAT for Graduate entry to Medicine (UCAS code: A101) in addition to A100.

The University of Leeds’ School of Medicine (UCAS code: A100) will use BMAT for all applicants.

The University of Leeds School of Dentistry (UCAS code: A200) will use BMAT for all UK-based applicants. Overseas applicants are not required to take BMAT.